މަންމައަށް ޝުކުރުކޮށް ހެޔޮދުއާ ކުރާއިރު ބައްޕަގެ ނަން ހަނދާން ނެތެނީ ކީއްވެ؟
ނުވަމަސް ދުވަހު ބަނޑުގައި ދަރިއަކު ހެދި ބޮޑުވެގެން އަންނައިރު އުފުލާ ބުރަ އެންމެ ބޮޑަށް އެނގޭނީ މަންމައަށެވެ. އެފަކީރު ނުނިދިގެން ކުކުރިކުކުރި އޮތީ ކިތައް ރޭކަމާއި އެރޭރޭގައި އެފަކީރު އުޅޭ ހާލު އިހުސާސް ކުރެވޭނީވެސް ހަމަ މަންމައަކަށެވެ. ދަރިއަކު ދުނިޔެއަށް އުފަންވުމުގައި އެއަޅާ ވޭނާއި ކެކުޅުން ހިތަށް ގެންނަންވެސް އެނގޭނީ ހަމަ މަންމައަކަށެވެ. ވިހެއުމަށްފަހު ތުއްތު ދަރިފުޅު މަސަލަސްކޮށް ހެޔޮގޮތުގައި ތަރުބިއްޔަތު ކުރުމުގެ އެންމެ ބޮޑު ޒިންމާ އަދާކުރަންޖެހޭ ފަރާތަކީވެސް ހަމަ އެ މަންމައެވެ.
މަންމައަކީ، ކެތްތެރި ކަމުގެ ލާމަސީލެކެވެ. ލޯތްބާއި އަޅާލުމާއި އޯގާތެރިކަމުގެ ނަމޫނާއެކެވެ. ވަރުބަލިކަމެއް ފޫހިކަމެއް ނެތް ހިތްވަރު ގަދަ ދަންމަރެކެވެ. ޝަކުވާ ކުރުމެއް ފުސްމޫނު ދެއްކުމެއްނެތި މައިން އެއުފުލާ ތަކުލީފުތަކުގެ ސަބަބުން އެބައިމީހުންގެ ދަރަޖަ މަތިވެރިވެގެން ދެއެވެ. އަންހެނުންނަށް ހެޔޮކޮށް ހިތުމަށާއި ލޯބިވުމުގައި ބަފަޔަށް ވުރެ މައިމީހާ އިސްކުޅައުމަށް އަންގަވާފައިވަނީ މިހިރަމިހިރަ ސަބަބުތަކާއި ހުރެއެވެ.
ހަމަ ޔަގީނުންވެސް އިސްވެދެންނެވި ކަންކަމުގައި މަންމައާއި އެންމެ ގާތުން ހިދުމަތްކުރަން ހުންނާނެ މީހަކީ ބައްޕައެވެ. އެދެމައިންގެ ހައްގުގައި ވާންޖެހުނު ކޮންމެ ގުރުބާނީއެއްވެ ކުރަންޖެހުނު ކޮންމެ ހަނގުރާމައެއް ފަސްޖެހުމެއް އަމާން ނެގުމެއް ނެތި އެ ބައްޕަ ކުރާނެއެވެ. ދަރިއެއްގެ ކަންކަން މަޔަކު ބަލަހައްޓަމުން ދާއިރު އެދެމައިންގެ އެންމެހައި ކަމެއްގެ ޒިންމާ ބޮލުގައި އަޅައިގެން ފިކުރުކޮށްލަކޮށްލާ ހުންނަ މީހަކީ ބައްޕައެވެ. އަމިއްލަ އެދުންތަކާއި އެތައް ހުވަފެންތަކެއް ގުރުބާންކޮށް ބުރަ މަސައްކަތުން ލިބުނީއާ ލިބުނު ހާ އެއްޗެއް އާއިލާގެ ހައްގުގައި ހޭދަކޮށްލަނީ އުފަލާއި އެކުގައެވެ.
ކަން މިހެން ހުރިއިރު ދަރިންނަށްޓަކައި ބަފަޔަކު ވާ ގުރުބާނީއަކީ ކިހާވަރެއްގެ ގުރުބާނީއެއްކަން ދަރިންނަށް ބުނެ އަންގައިދިނުމަކީ މަންމަގެ ޒިންމާއެކެވެ. އެކަން ހަނދާންކޮށްދިނުމަށް ދަރިފުޅުގެ ގާތުގައި ގިނަ ވަގުތު ހުންނާނީ މަންމައެވެ. އެކަމަކު ދަރިންނަށް ހަމައެކަނި މަންމަގެ ގުރުބާނީ ތަކުގެ ވާހަކައާއި މަންމަ ކޮށްދޭ ކަންކަމުގެ ވާހަކަ ކިޔައިދޭނަމަ ނަތީޖާއަކަށްވެގެން ދާނީ ބައްޕައަކީ އެއްވެސް އަގެއްނެތް މީހެއްގެ ގޮތުގައި ދަރިންނަށް ހީވުމެވެ. އެކުދިންގެ ހިތުގައި މައިމީހާއަށް އިންތިހާއަށް ލޯބި އޮންނައިރު ބައްޕައަށް އެއްވެސް ލޯތްބެއް ގަދަރެއް ނެތުމެވެ. މިހާރު މީސްމީޑިއާއިން މިފެންނަ ފަދައިން މަންމައަށް އެތައް ތަޢުރީފެއް އޮހެމުންދާއިރު ބައްޕައަށް ތަޢުރީފެއް ކޮށްލާނެ ދަރިއަކު ނުވުމެވެ. މަންމައަށް އެތައް ދަރިންނެއް ހެޔޮދުއާ ކުރާއިރު ބައްޕައަށް ހެޔޮދުއާއެއް ކޮށްލާނެ ދަރިން މަދުވުމެވެ. މަންމަގެ ހެޔޮކަމުގެ ވާހަކަ ދެކެވޭއިރު ބައްޕަގެ ގުރުބާނީތަކުގެ ވާހަކަ ހަނދާންނެތުމެވެ.
އިސްލާމްދީ އަޅުގަނޑުމެންގެ މައްޗަށްބާރުއަޅަނީ މައިންބަފައިންނަށް ހެޔޮކޮށް ހިތުމަށާއި އެދެމީހުންނަށްޓަކައި ހެޔޮދުޢާ ކުރުމަށެވެ.
" رَّب ارْحَمْهُمَا كَمَا رَبَّيَانِي صَغِيرًا "
🎯 ލިޔުން ކަމުދިޔަނަމަ ޝެއަރ ކޮށްލެއްވުން އެދެމެވެ.
