ފުރާޅުގެ ޚުޝޫޢަތްތެރިކަން.
މީހަކު ގެއެއް ކުއްޔަށް ހިފައިގެން އުޅުނެެވެ. އެއީ މަތިވަޑާންގަނޑު ވަރަށްބޮޑަށް ބާވެ، ފުރާޅުން ވާރޭ ހިޔާނުވާ ގެއެކެވެ. އެ ގޭގެ ވެރިމީހާ ފުރާޅު މަރާމާތު ކޮށްދޭކަށެއް ނޫޅެއެވެ. އެކަމަކު ބަރާބަރަށް ކޮންމެ މަހަކު ކުލި އަތުލައެވެ. އެގޮތުން އެއްފަހަރަކު ގޭގެ ވެރިމީހާ ކުލި ބަލައި އައުމުން، ކުއްޔަށް ހިފައިގެން އުޅޭ މީހާ ބުންޏެވެ. "މިހާރު ރޭގަނޑެއްގައި ލޮލުފިޔައެއްވެސް ޖެހޭވަރެއް ނޫނެވެ. ވައިރޯޅިއެއް ޖެހިލައިފިނަމަ، ފުރާޅުން އިވެނީ ތުރުތުރު އަޅާ އަޑެވެ. ވާރޭފޮދެއް ވެހިލައިފިނަމަ، މުޅި ގޭތެރެ އޮންނަނީ ފެންބޮޑުވެފައެވެ." ގޭގެ ވެރިމީހާ ބުންޏެވެ. "ކަންބޮޑުވެ ހާސް ނުވާށެވެ! ވައިރޯޅިއެއް ޖެހިލައިފިނަމަ ފުރާޅު ތުރުތުރުއަޅަނީ، މާތްﷲ ގެ ޙަޟުރަތަށް ޚުޝޫޢަތްތެރި ވުމަށްޓަކައެވެ. ފުރާޅުން އިވޭ އަޑަކީ، އެކަލާނގެ ޙަޟުރަތަށް ފުރާޅު ތަސްބީޙަ ކިޔާ އަޑެވެ. ފުރާޅުން ފައިބާ ފެނަކީ ރަޙުމަތުގެ ވާރެޔެވެ."
އެހިނދު ކުއްޔަށް ހިފައިގެން އުޅޭމީހާ ބުންޏެވެ. "ތިމަންނާ ކަންބޮޑުވެ ހާސްވަނީ، ފުރާޅު ޚުޝޫޢަތްތެރިވެ، ތަސްބީޙަ ކިޔައި، އަދި ފުރާޅުން ރަޙުމަތުގެ ވާރޭ އޮހޭތީއެއް ނޫނެވެ. އެކަމަކު، ފުރާޅުގެ ޚުޝޫޢަތްތެރިކަން އިތުރުވަމުންގޮސް އެންމެފަހުން، ތިމަންނާއާއި، ތިމަންނާގެ އަނބިދަރީން ނިދާފައިތިއްބާ، މި އެންމެންގެ ބޯމައްޗަށް، ފުރާޅު ސަޖިދަކޮށްފާނެތީއެވެ.
